Cando andamos polo século XXI e as vilas e cidades se ateigan de vehículos a motor, xurde a necesidade de humanizar os espazos públicos, cuxo fin non ven a ser outro que a harmonización da edificación coa paisaxe, das urbanizacións coas poboacións que as habitan, proporcionando un uso ordenado e sostible, con cabida para todo o tecido social e humano, con indiferenza da súa condición no seu máis amplo sentido: nais e pais, avós e avoas, persoas con problemas de mobilidade ou con discapacidades nas súas condicións físicas ou mentais e, sobre todo nenas e nenos. O proxecto “Noveolas”, ademais de novidoso, ven garantir un uso absoluto dos espazos públicos da fermosa Vila de Cangas, sostible e humano; o achegamento das persoas do mar, xentes habitadoras e visitadoras, a ese mar que tanta presenza ten nesta xeografía; o desfrute dun lecer construtivo onde o verbo, ...a palabra sexa conxugada con plenitude polas distintas xeracións sen interrupcións e sen perigos. “Noveolas” que nace como un proxecto de humanización do Peirao de Cangas, con seguridade vai incidir no desenvolvemento social, cultural e económico de toda a vila. A facilidade e comodidade da mobilidade sen tráfico vai favorecer sensiblemente a achega a toda a zoa de influencia do devandito plan, de fácil e breve acceso. As dúbidas xeradas particularmente, non viñan a ser outras que a dificultade da execución do proxecto debida a súa dimensión, así como os custos da mesma, porén, todo iso foime disipado ao escoitar e ver os datos revelados polo seu impulsor, con contundencia e seguridade, tanto no referido á debida complexidade, como aos seus custos, que se concretan en custo cero para a cidadanía, sendo sufragado por inversión privada. “Noveolas”, proxecto necesario para un mellor desenvolvemento de Cangas, vai supor unha sensible mellora asemade para a circulación rodada ao evitar aglomeracións de superficie en pleno núcleo poboacional, para descorrer polo subsolo, ademais de ofertar servizos tan necesarios como o estacionamento para o uso de veciñanza, comercio ou visitantes. Unha ensoñación de Rufo -Rafael Barreiro Rodal- que debemos entendela como algo vital para unha cidade mellor e mais habitable, humana e integradora; unha Cangas sensible coa sostibilidade, coa recuperación de espazos que a mal entendida civilización foi esquilmando, para devolverlla á cidadanía. Unha Cangas sensible coa pluralidade, coa cidadanía, coas discapacidades, coas persoas maiores, coa infancia. Cangas, cidade de tod@s e para tod@s.